World Wide Vikings - Turrapport

Langfredags ettermiddag gjekk turen til topps på Halsnøy, også kalla Perlo (fordi øya rett og slett er perla i Sunnhordland) eller Basarholmen. Køyrde forbi Høylandsbygd og parkerte på parkeringsplassen etter Mjelkevik der det skiftar frå asfalt til grus-/skogsveg. Ser at andre har køyrd lengre men det er altså her vegen sluttar..

Gjekk så langs vegen vidare, gjennom grinda (her er det ein flott liten foss) og kort etter opp til høgre der skogsvegen deler seg. Etter ei kort stigning tek det av ein sti på høgre sida på ei lita flate. Her var det markert med nokre plastband og det låg nokre store tømmerstokkar langs stien der den starta, men uansett bør det vera greit å finna kor stien startar.

Stien var relativt våt men brei og tydeleg. Etter ei stund svingar stien skarpt til høgre der det også er mogeleg å gå rett fram. Til høgre var tydlegast sti så eg valde denne og var godt nøgd med det valget. Vidare oppover går stien først i terreng med store kampesteinar/berg, og vidare oppover i relativt open skog til å vera i dette området. Det var noko utsyn over mot fastlands-Kvinnherad på vegen oppover, men når blada spring så tippar eg at utsynet er svært begrensa.

Mot toppen var det enkelte plastband som viste at ein var på rett veg, men stien var ikkje vanskeleg å sjå.

Sjølve toppen er eit lite berg utan vegetasjon. Litt utsyn mot nord, men relativt begrensa. Det er bolt i berget, informasjonstavle med blant anna Halsnøysangen og toppbok. Liten grunn til å tvila på at ein er komen til topps altså.

Turen ned att gjekk same vegen sjølv om eg på toppen såg at det var raudmerka sti nedover i ein annan retning. Halvannan time på tur i moderat/rask gangfart.

Så no har eg kryssa av for toppen på Perlo også i samlinga. I ungdomen var eg på "jentejakt" på denna øya, no har eg altså vore på toppjakt. Toppen var fin men jentene var nok finare :-)